عايز تشتري بيت او اشتريت خلاص؟
يبقى أكيد بتفكر في التشطيب وبيجي على بالك سؤال وهو يا ترى ايه هي انواع التشطيب وايه الفرق بينهم؟
علشان كده عملنالك الدليل ده في “التشطيب وأنواعه والفروق بينهم” واللي هيكون مفيد جدا بالنسبة لك خاصة لو لسه مااشترتش وحدتك بالإضافة لو بتتعامل مع صنايعية أو شركة ديكور وتشطيب هتكون محتاج الدليل ده ومحتاج تعرف المصطلحات اللي فيه
في التشطيب فيه 7 أنواع هما:
بدون تشطيب
نص تشطيب – على المحارة
تشطيب كامل – تشطيب تجاري
تشطيب لوكس
تشطيب سوبر لوكس
تشطيب الترا لوكس
تشطيب ديلوكس
اولا : بدون تشطيب
ودي المرحلة الأولى واللي الشقة أو الوحدة بتكون فيها على الطوب بس، مافيهاش أي حاجة تانية غير الطوب والعمدان وسقف خرسان عشان كده احيانا بيقولوا عليها “شقة على العضم”
ثانيا: نص تشطيب:
وفي النوع ده بتكون الوحدة تم تأسيس الكهرباء والسباكة فيها وتم مد المواسير في الحوائط لكن من غير أسلاك لسه
كمان بيكون تم مد مواسير ووصلات المياه للأجزاء الرئيسية بس
وبيكون تم تركيب الحلوق الخشب للأبواب والشبابيك وتم عمل المحارة عشان كده بيكون الاسم التاني “للنص تشطيب” هو “على المحارة”
وسعر المتر في المرحلة دي بيكون بمتوسط 275 جنية للمتر
التشطيب الكامل
في النوع ده من التشطيب بتكون الوحدة خلص فيها أغلب أعمال التشطيب زي الكهرباء والسباكة وبيكون كمان تم تركيب الأرضيات والسيراميك والحمامات والأبواب والشبابيك والوحدة كمان ادهنت
لكن عادة ما بيكون التشطيب في “التشطيب الكامل” متواضع الى حد ما والخامات المستخدمة في التشطيب كمان بتكون مش جودتها عالية فممكن تلاقي مثلا السيراميك يكون فرز تاني مش أول، عشان كده البعض بيسمي النوع ده من التشطيبات باسم “التشطيب التجاري”.
وسعر المتر في المرحلة دي بيكون بمتوسط 750 جنية للمتر
رابعا: تشطيب لوكس:
في التشطيب اللوكس الشقة بتكون برده متشطبة تشطيب كامل زي النوع اللي فات وخلاص جاهزة على السكن لكن اللي بيفرق “التشطيب اللوكس” عن”التشطيب الكامل” أو “التشطيب التجاري” هو جودة التشطيب واللي بيكون أعلى في التشطيب اللوكس والخامات المستخدمة بتكون كذلك جودتها أعلى فمثلا في الغالب الشقة اللي تشطبيها لوكس وفيها سيرميك هتلاقيه فرز أول مش فرز تاني زي التشطيب التجاري.
وسعر المتر في المرحلة دي بيكون بمتوسط 1500جنية للمتر
خامسا: تشطيب سوبر لوكس:
التشطيب السوبر لوكس بيكون أعلى من التشطيب اللوكس والتشطيب التجاري من حيث جودة التشطيب والخامات، كمان بيبقى في حاجات اضافية ماكنتش موجودة في أنواع التشطيب اللي قبل كده زي إضافات وكماليات في شغل السباكة والكهرباء ووجود وصلات للسخان ووصلات وصرف للتكييف وعمل عزل للأرضيات
واستخدام البورسلين كبديل أفضل في الفخامة من السيراميك وعمل أسقف جيبسون بورد وكرانيش
كمان في الأخشاب والحلقان للأبواب والشباك غالبا بيتم استخدام أنواع زي الموسكي
وسعر المتر في المرحلة دي بيكون بمتوسط 2000جنية للمتر
سادسا: تشطيب الترا لوكس:
والتشطيب الالترا لوكس بيكون أعلى من السوبر لوكس في جودة التشطيب والخامات المستخدمة فيه فمثلا هنلاقي بيستخدم في النوع ده أرضيات بورسلين او خشبية مع أبواب وشبابيك من خشب زان طبيعي او ما يشابهه في الجودة والفخامة ومكن كمان نلاقي الأسقف معمولة مستويين وفيها نور وكرانيس بشكل مميز.
والنوع ده من التشطيب بيكون أغلى الأنواع السابقة وده لانه بُيستخدم فيه إكسسوارات وخامات فخمة ومرتفعة السعر زي الزجاج الدبل، كمان بيتم مراعاة الديكور وتناسق الألوان والمساحات في التشطيب الالترا لوكس.
وسعر المتر في المرحلة دي بيكون بمتوسط 3000جنية للمتر
سابعا: تشطيب ديلوكس:
وده اخر وأفضل أنواع التشطيب وأكثرهم فخامة وبيستخدم فيه أغلى الاكسسوارات والخامات وبيراعى فيه أفضل مبادئ تصميم الديكور لإبراز الفخامة
كمان في التشطيب الديلوكس الأرضيات بتكون من الرخام أو الباركيه الخشب الطبيعي والأسقف بتكون مستويات متعددة وفيها ديكورات مميزة كمان بيكون بعض الغرف ليها تصاميم خاصة مختلفة عن باقي الوحدة وبنستخدم فيها أفضل أنواع الدهان والتجاليد، بالإضافة إلى إن الخشب المستخدم في النوع ده من التشطيب عادة بيكون خشب الأرو الطبيعي الأمريكي مع استخدام أفضل أنواع الألومنيوم والزجاج الدبل العاكس.
عشان كل ده بيعتبر التشطيب الديلوكس أفضل انواع التشطيب وأكثرهم فخامة وبالتالي أكثرهم تكلفة
بناء على ما سبق ممكن نقسم كل أنواع التشطيب لثلاثة أنواع رئيسية هما:
تشطيب أولى: وده بيضم النوع الأول اللي الشقة أو الوحدة عموما بتكون فيه على الطوب والعمدان وده مش تشطيب لكن هو وصف لحالة بتكون عليها الشقة أو الوحدة بتاعتك كمان “النص تشطيب” أو “تشطيب على المحارة” زي ما البعض بيسميه بيكون تحت اسم التشطيب الأولي
تشطيب عادي: وده اللي بيكون ملائم لمتطلبات السكنو بيضم النوع الثالث “التشطيب الكامل” أو التشطيب التجاري” حسب مسمى البعض بالإضافة للنوع الرابع من التشطيب “التشطيب اللوكس”
تشطيب مميز: وده بيبان فيه اكتر جمال تصميم الديكور والفخامة في التنفيذ وبيندرج تحت النوع ده “ألتشطيب السوبر اللوكس” “التشطيب الالترا دليل أنواع التشطيب والفرق بينهم
